Azkuna Zentroak uda kulturaz bizitzeko proposamen zabala prestatu du Bilbon
Udako egitarauaren ardatz nagusia Glenda León artista kubatarraren Zuhaitz bat basoan erortzen da erakusketa da. Irailaren 27ra arte ikusgai egongo den erakusketak artistaren ibilbideko lan esanguratsuenak biltzen ditu, instalazioa, argazkia, bideoa eta soinua uztartuz. Isiltasuna, natura, hizkuntza eta pertzepzioa dira bere sormenaren ardatzak, eta proposamenak esperientzia artistiko irekia eskaintzen dio bisitariari. Gainera, ostegunero 30 minutuko bisita laburrak egingo dira erakusketa hobeto ezagutzeko.
Tokiko sormenak ere protagonismo berezia izango du uztailean. This is Basque Design Merkatua uztailaren 10etik 12ra egingo da Kulturen Atarian, eta dendAZ komunitateko hogeita hamar bat diseinatzaileren lanak ezagutzeko aukera eskainiko du. Moda, bitxigintza, ilustrazioa, dekorazioa, papergintza eta artisau-produktuak izango dira ikusgai, tokiko diseinuaren eta ekoizpen jasangarriaren aldeko apustua erakutsiz.
Merkatuarekin batera, parte hartzeko hainbat tailer antolatu dituzte. Horien artean daude José Ramón Ais artistaren zianotipia tailerra eta Yolanda Sánchez sortzailearen Shibori tindaketa japoniarraren hastapenak ezagutzeko saioa.
Familiek ere beren tokia izango dute programazioan. BBK Mediatekan, Loreak, trenak eta munstroak erakusketarekin lotuta, 6 eta 12 urte arteko haurrei zuzendutako sormen-jarduerak egingo dira uztailean. Komikia eta irudimena ardatz hartuta, parte-hartzaileek beren istorio propioak sortzeko aukera izango dute.
Bisita gidatuak
Horrez gain, uda osoan zehar bisita gidatuak eskainiko dira eraikinaren historia eta eraldaketa ezagutzeko. Alondegi zaharraren iragan industriala, Philippe Starcken berrikuntza arkitektonikoa eta Atariko 43 zutabe ospetsuen sekretuak ezagutzeko aukera izango dute bisitariek, euskaraz zein gaztelaniaz.
Egitaraua Golem Alhóndigako zinema-eskaintzarekin, gastronomia-guneekin eta jarduera fisikorako aukerekin osatzen da. Gainera, aurten ere Azkuna Zentroa Bilboko klima-babesleen sarearen parte izango da; horrela, tenperatura altuetatik babesteko espazio atsegina eskaintzeaz gain, kulturaz gozatzeko topagune irekia izango da uda osoan.